Nú er verið að tala um að ríkisstjórnin í allri sinni dýrð ætli ekki einungis að skera niður til háskólasamfélagsins, heldur mun fjármögnun ríkishallans einnig birtast í formi aukinna álaga á námsbækur. Hvenær enda þessi ósköp? Stúdentaráð fékk þær fregnir að á bækur muni leggjast auka 7-12% skattur nú um áramótin. Þetta þýðir enn frekari útgjöld fyrir okkur námsmenn.

Stúdentaráð Háskóla Íslands harmar þá ákvörðun nokkurra deilda við félagsvísindasvið að hverfa aftur til fyrra fyrirkomulags á sjúkra- og endurtektaprófatímabili . Deildirnar sem um ræðir eru viðskiptafræði-, hagfræði-, laga- og félagsráðgjafardeild. Breytingarnar eru fólgnar í því að færa sjúkra- og upptökuprófatímabil frá janúar og júní til ágúst, með eins ár aðlögunarferli þar sem prófin verða þreytt í lok maí og byrjun júní.